მიმდინარე წელს, საქართველოს იუსტიციის სამინისტროს სახელმწიფო სერვისების განვითარების სააგენტომ, გაეროს ლტოლვილთა უმაღლესი კომისარიატის (UNHCR) მხარდაჭერით, მოქალაქეობის არმქონე/უდოკუმენტო პირების იდენტიფიცირებისა და დოკუმენტირებისთვის „კარდაკარ“ კამპანია, სლოგანით - „დააფიქსირე შენი არსებობა“ განახორციელა.
კამპანია აპრილი-დეკემბრის განმავლობაში, მთელი ქვეყნის მასშტაბით მიმდინარეობდა და მის მიზანს მოქალაქეობის არმქონეობის აღმოფხვრა, საქართველოს სხვადასხვა რეგიონში უდოკუმენტო პირების გამოვლენა და მათი დოკუმენტირების უზრუნველყოფა წარმოადგენდა.
სახელმწიფო სერვისების განვითარების სააგენტოს მობილური ჯგუფები, კამპანიის მიმდინარეობისას, რეგიონებში მოქალაქეობის არმქონე პირების იდენტიფიცირებას, მოქალაქეობრივი სტატუსის განსაზღვრასა და დოკუმენტირებას უზრუნველყოფდნენ. კამპანიის ფარგლებში, სააგენტოს მიერ გამოვლენილმა პირებმა სრულიად უფასოდ მიიღეს პირადობის დამადასტურებელი დოკუმენტი.
„კარდაკარ“ კამპანიის განხორციელება საქართველოს მთავრობის მიერ 2019 წელს, მოქალაქეობის არმქონე პირების შესახებ მაღალი დონის სეგმენტის ფარგლებში აღებულ ვალდებულებას წარმოადგენდა, რომლის მიზანიც სწორედ მოქალაქეობის არმქონე პირების იდენტიფიცირება და დოკუმენტირება იყო.
სახელმწიფო სერვისების განვითარების სააგენტოს ინფორმაციით, საქართველოში მოქალაქეობის არმქონე პირების რაოდენობა მცირეა, თუმცა, სახელმწიფო იღებს შესაბამის ზომებს, რათა საქართველოში მცხოვრები თითოეული მოქალაქე იყოს რეგისტრირებული და ფლობდეს პირადობის დამადასტურებელ დოკუმენტს, გახდეს საზოგადოების სრულფასოვანი წევრი, ისარგებლოს მისთვის კანონით მინიჭებული უფლებებითა და ყველა სახელმწიფო სერვისით.
